|
|
Maŋimus ođas
- Webinára boazodolliide CWD (oaivevuori) birra
CWD fuomášuvvui vuosttaš geardde gottiin ja ealggain Norggas 2016:s ja ruksesgottiin (hjortain) 2017:s. CWD lea priondávda mas gávdnojit iešguđetlágan šlájat. Eahpemihtilmas CWD lea fuomášuvvon ealggain ja ruksesgottiin Ruoŧas, Norggas ja Suomas. Eahpemihtilmas šládja čuožžila fáhkka earenoamážit boarráset elliin iige rehkenastojuvvo njoammu dávdan. CWD njoammu šládja lea fuomášuvvon gottiin Nordfjellas ja Hardangerviddas. Balahuvvon njoammu CWD boazodoalus norgga bealde oaččui muhtun vahkuid áigi stuorra fuomášumi median ovdal go loahpalaš analysa iskosiin čájehuvvui lea negatiiva.
Sámiid Riikkasearvi, SSR (Ruoŧŧa) ja Boazodearvvašvuođabálvalus (Norga) dollet webinára eahkes CWD birra. Webinára lea jurddašuvvon boazodolliide norgga ja ruoŧa bealde.
- CWD – mii lea priondávda ja movt dat njoammu?
- Dávdda goziheami stáhtus norgga bealde.
- Gii dahká maid CWD oktavuođas? Guđet áššebealit/eiseválddit barget CWD:in daid iešguhtege riikkain ja movt lea bargojuohku?
- Vásáhusat dan balahuvvon CWD dáhpáhusas mii duođaštuvvui leat boastut muhtun vahkuid dás ovdal.
- Digaštallan plánejuvvon barggu birra gearggusvuođaplánaiguin ruoŧa ja norgga bealde. Lea go dárbu oktasaš gearggusvuođaplánii?
Logaldallamat leat norgga ja ruoŧa bealde ja leat buorit vejolašvuođat jearrat logaldallamis ja maŋŋil.
Čállet áinnas sisadieđiheapmái jus dis ležžet dihto gažaldagat maid dii háliidehpet mii galgat vástidit eahketbottas.
Duorastaga golggotmánu 27. beaivvi dii. 19.00 - 20.30 Teamsa bokte.
Áigemearri dieđihit iežat lea: gaskavahku golggotmánu 26. beaivvi. Liŋkka čoahkkimii sáddejuvvo maŋemusat beaivvi mielde 27/10.
- Boazodearvvašvuođabálvalusa birra
Boazodoallošiehtadusaid 2021/22 oktavuođas várrejuvvui ruhta ásahit dearvvašvuođabálvalusa bohccuid várás. Álggos lea álggahuvvon 3-jagáš pilohttaprošeakta mii lea biddjon Veterinærinstituhttii Romssas. Prošeakta lea ásahan stivrenjoavkku mas Eanandoallo- ja biebmodepartemeanta ja Norgga Boazosápmelaččaid Riikasearvi leat oasseváldit ja eanandoallodirektoráhtta lea čállingoddi.